पोखरामा एटिएम मेसिन फोडेर चोरी गर्ने एक हप्तादेखि फरार

खबर मुकाम
२०७९ साउन ११ बुधबार

खबरमुकाम । पोखरामा एक हप्ता अगाडि एनएमबी बैंकको एटिएम मेसिन फोडेर १५ लाख चोरी भएकोमा चोरी गरेर फरार हुनेलाई प्रहरीले हालसम्म पहिचानसमेत गर्न सकेको छैन ।

पोखरा महानगरपालिका वडा नं २६ को अर्घौचोकमा रहेको एनएमबी बैंकको एटिएम मेसिन फोरेर रकम चोरी भएको एक हप्ता बितिसक्दा पनि कास्की प्रहरीले आरोपीको सुइको सम्म पाउन सकेको छैन ।

एटिएमभित्रको पैसा राख्न प्रयोग भएका बाकस भोलिपल्ट नै प्रहरीले भेट्टाए पनि प्रहरीले घटनामा संलग्न व्यक्ति भने अझै पत्ता लाग्न नसकेपछि कास्कीको सुरक्षाको व्यवस्थामा चुनौती थपिएको छ । यस घटनाभन्दा केही दिन अगाडि पनि पोखराको न्युरोडमा रहेको एनआईसी एसिया बैकको एटिएम फोड्ने प्रयाससमेत भएको थियो ।

पोखरामा समय-समयमा एटिएम मेसीन फोड्ने प्रयास हुँदै गर्दा बैंक तथा वित्तीय संस्था र प्रहरीले पनि झन् सावधानी अपनाउनु पर्ने अवस्था आएको छ । पटकपटक एकै प्रकृतिको घटना दोहोरिँदै गर्दा यति बेला सामाजिक संजालदेखि मिडियासम्म यस बारेमा बहस शुरू भएको छ ।

चोरीको घटना बाहिर आएपछि बैंकले सुरक्षा गार्डको व्यवस्थापन गरेका थिए कि थिएनन् ? एटिएम मेसिन राम्रोसँग लक गरिएको थियो कि थिएन ? एनएमबी बैंक चोरीपछि अर्को बैंक चोर्न गएका हुन् वा दुईवटा बैंकमा चोर्न पुग्ने एउटै व्यक्ति हुन् ? लगायतका विभिन्न प्रश्नहरू आइरहेका छन् ।

त्यस्तै, उत्कृस्ट बैंकको रूपमा चिनिँदै आएको बैंकको एटिएम मेसिन नै फोडेर भागेको समाचार आएपछि बैंकको सुरक्षामा पनि प्रश्न आएको छ ।