अधुरै भयो पाइलटमा बढुवा हुने अञ्जुको सपना

खबर मुकाम
२०७९ माघ ०१ आइतबार

खबरमुकाम । पोखरामा दुर्घटना भएको यती एयरलाइन्सको जहाजको पाइलट थिइन्, अञ्जु खतिवडा । जहाज दुर्घटनामै उनको पनि मुत्यु भएको छ । यस्तो दुःखद खबरसँगै उनको माइती गाउँ शोकमा डुबेको छ ।

अञ्जु २०६३ साल पछि पाइलट बन्ने ध्याउन्नमा लागेकी हुन् । उनको विवाह २४ वर्षअघि काठमाडौं बत्तीसपुतलीका दीपक पोखरेलसँग भएको थियो ।

उनको श्रीमान् आर्मीको हेलिकप्टरको को–पाइलटपछि यति एयरलाइन्सको पाइलट बनेका थिए । तर, २००६ मा जुम्लामा भएको यतिको जहाज दुर्घटनामा पोखरेल मुत्यु भएको थियो ।

आफ्ना श्रीमानको सफल विमान चालक बन्ने सपना अधुरै रहेको ठानेर अञ्जुले श्रीमान्को सपना पूरा गर्ने निधो गरिन् । आफ्ना बुबा गोविन्द खतिवडा र आमा इन्दिरा खतिवडाले नर्सिङ अध्ययन गर्न भनेपनि उनी श्रीमानकै सपना पुरा गर्न भन्दै पाइलट बन्ने अभियानमा लागिन् ।

तर उनको पनि आइतबार पोखराको सेती खोँचमा यति एयरलाइन्सको जहाज दुर्घटनामा मृत्यु हुँदा परिवारजन मात्र नभएर पूरै चाँदनी चोक शोकमा डुबेको छ ।

विराटनगर- ५ घर भएकी उनका बुबा गोविन्द खतिवडा ६५ वर्ष माथिका भए । उनकी आमा इन्दिरा खतिवडा पनि अन्दाजी ६० वर्ष पुगिन् । अञ्जु पाइलट कोर्स गर्न ६ वर्षकी छोरी मेलिसालाई नेपालमै छाडेर अमेरिका गएकी थिइन् । अहिले उनकी छोरी मेलिसा क्यानडामा अध्ययनरत रहेको पारिवारिक स्रोतले जनाएको छ । उनलाई पनि विमान दुर्घटनाबारे सूचना पठाइएको पारिवारिक स्रोतको भनाइ छ ।

यति एयरलाइन्सका अनुसार अञ्जुले यसअघि भद्रपुर, विराटनगर, धनगढी लगायत ठुला जहाज उडान हुने विमानस्थलमा सफल उडान गरिसकेकी थिइन् ।

पारिवारिक स्रोतका अनुसार आइतबार काठमाडौं–पोखराको उडान गरिसकेपछि उनको पाइलटमा बढुवा हुने अन्तिम परीक्षण उडान थियो । अन्जुका अभिभावकले विलौनाका साथ भने, ‘उद्देश्य पूरा हुन नपाउँदै उनी नै विलय भइन् ।’