प्राविधिक समस्याले सेवा अवरुद्ध भएकामा टेलिकमको क्षमायाचना

खबर मुकाम
२०७९ माघ ०४ बुधबार

खबरमुकाम । नेपाल टेलिकमले प्राविधिक समस्याका कारण सेवा अवरुद्ध भएकोमा क्षमा याचना मागेको छ ।

टेलिकमले मंगलबार करिब १२ बजेदेखि केही उपकरणमा प्राविधिक समस्या आई छोटो अवधिका लागि मोबाइल तथा पिएसटिएन टेलिफोन सेवा अवरुद्ध हुन गएकोमा कम्पनीका प्राविधिकहरुबाट तत्काल समाधान गरिएको बताएको थियो ।

तर, समाधान भइसकेपछि पनि छोटो अवधिका लागि रोकिएका कलहरुको संख्यामा एक्कासी अत्यधिक वृद्धि हुन गई नेटवर्क कञ्जेसनका कारण केही समय कल आदान प्रदानमा समस्या देखा परेपछि टेलिकमले ग्राहकहरुसमक्ष क्षमायाचना मागेको हो ।

भविष्यमा यस्ता समस्या दोहोरिन नदिन कम्पनीले प्रणालीगत सुधार कार्य निरन्तर गरिरहने टेलिकमले जनाएको छ । टेलिकमले सेवाग्राहीलाई अविच्छिन्न, निर्वाध गुणस्तरीय दूरसञ्चार सेवाहरु प्रवाह गर्न सदा प्रतिबद्ध रहेको जनाएको छ ।

यसका साथै मोबाइल, टेलिफोन तथा कम्पनीका अन्य सेवाहरुमा कुनै समस्या आएमा १४९८ र १९८ मा सम्पर्क गरी समाधानका लागि पहल गर्न टेलिकमले ग्राहकहरुलाई अनुरोध पनि गरेको छ ।