जेठभित्र देशभर संगठन विस्तार गर्ने रास्वपाको निर्णय

खबर मुकाम
२०७९ माघ ०९ सोमबार

खबरमुकाम । राष्ट्रिय स्वतन्त्र पार्टी (रास्वपा) ले आगामी जेठभित्र देशभर संगठन विस्तार गर्ने निर्णय गरेको छ । आइतबार बसेको पार्टीको केन्द्रीय समितिको बैठकले यस्तो निर्णय गरेको हो ।

माघ १४ मा प्रदेश १ को विराटनगरमा भेला हुने पार्टी प्रवक्ता मुकुल ढकालले जानकारी दिए । त्यस्तै, १६ माघमा मधेश प्रदेशको जनकपुर, १८ माघमा बागमतीको मकवानपुर, २१ माघमा गण्डकीको पोखरा र २४ माघमा लुम्बिनीको दाङमा भेलाको आयोजना गरिने ढकालले जनाएका छन् ।

रास्वपाले २६ माघमा सुदूरपश्चिमको धनगढी र २८ माघमा कर्णालीको सुर्खेतमा भेला हुने र माघ मसान्तभित्र प्रदेश समितिका विस्तारित भेला हुने रास्वपाले जनाएको छ । त्यसबाट प्रदेश समिति पुनर्गठन गर्ने रास्वपाको तयारी छ ।

त्यस्तै, चैतसम्म जिल्ला निर्वाचन समिति गठन गरिने विज्ञप्तिमा उल्लेख गरिएको छ । रास्वपाले जेठ मसान्तसम्म पालिका र वडास्तरीय समिति गठन गर्ने तयारी गरेको छ ।