प्रधानमन्त्रीलाई विश्वासको मत दिने गठबन्धनको निर्णय, विधेयक भोलि संसदमा पेस हुने

खबर मुकाम
२०७९ चैत ०४ शनिबार

खबरमुकाम । प्रधानमन्त्री पुष्पकमल दाहाल प्रचण्डले चैत–६ गते संसदबाट विश्वासको मत लिने र १० वटै दलले उहाँलाई मत दिने निर्णय भएको छ । प्रधानमन्त्रीको सरकारी निवास बालुवाटारमा १० दलका शीर्ष नेताहरुको बैठकले उक्त निर्णय गरेको प्रधानमन्त्री प्रचण्डको सचिवालयले जनाएको छ ।

त्यस्तै, सत्ता साझेदार १० वटा दलले बेपत्ता पारिएका व्यक्तिको छानबिन, सत्य निरुपण तथा मेलमिलाप आयोग ऐन–२०७१ लाई संशोधन गर्न बनेको विधेयक–२०७९ भोलि संसदमा पेस गर्ने निर्णय गरेका पनि सचिवालयले जनाएको छ ।

बालुवाटारमा बसेको नेपाली कांग्रेस, नेकपा माओवादी केन्द्र, एकीकृत समाजवादी पार्टी, जनता समाजवादी पार्टी, नागरिक उन्मुक्ति पार्टी, जनमत पार्टी लगायतका १० वटा दलका शीर्ष नेताहरु सो निर्णय गरेका हुन् ।

नेकपा एमाले र राप्रपाले संसदीय समितिमा छलफल गराएर मात्रै विधेयकलाई संसदमा पेश गर्न माग गरेपनि सत्ता गठबन्धनले भने भोलि नै पेस गर्ने निर्णय गरेको हो ।