‘कोशी प्रदेश’ नामको विरोधमा भोलि प्रदेश बन्द आह्वान

खबर मुकाम
२०७९ चैत ०४ शनिबार

खबरमुकाम । सात प्रदेशमध्ये सबैभन्दा अन्तिममा नाम पाएपनि ‘कोशी प्रदेश’ले अहिले नामकै कारण तनावमा छ । कोशी नाम राखिएपछि पहिचान पक्षधरहरुले यसको विरोध र आन्दोलन गर्दै आएका छन् ।

आइतबार पनि प्रदेशको राजधानी विराटनगरमा उनीहरुले बृहत प्रदर्शन गर्ने भएका छन् । भोली ‘कोशी प्रदेश’ नामाकरण खारेज गरी पहिचानसहितको नामाकरणको मागसहित १ नम्बर प्रदेश पुनःनामाकरण संयुक्त संघर्ष समितिले प्रदर्शनको तयारी गरेको छ ।

समितिले राजधानी विराटनगरमा बृहत प्रदर्शनको तयारी गर्दै छ । यससँगै जिल्ला प्रसाशन कार्यालय मोरङले विराटनगरका केही स्थानमा निषेधाज्ञा जारी गरेको छ ।

प्रदेश नम्बर १ को नाम कोशी प्रदेश नाम राखिएको विषयलाई लिएर संघीय लोकतान्त्रिक राष्ट्रिय मंच, लिम्बुवान लगायत एक दर्जन जातीय सङ्गठनले आज (शनिबार) पनि जुलुस निकालेका थिए ।

प्रदेश संसद्ले एकलौटी ढङ्गले प्रदेशको नामाकरण गरेको भन्दै विरोध स्वरूप आइतबार प्रदेश नम्बर १ बन्दको आह्वान समेत गरिएको स्रोतले जनाएको छ ।