काठमाडौं । नेपाल अटोमोबाइल इम्पोर्टर्स एण्ड म्यानुफ्याक्चरर्स एसोसिएसन (नाइमा) ले रसुवाको भोटेकोशी नदीमा आएको बाढीबाट प्रभावित क्षेत्रप्रति दुःख व्यक्त गरेको छ । टिमुरे, स्याफ्रुबेँसी र रसुवागढी क्षेत्रमा जनजीवन, पूर्वाधार तथा सार्वजनिक र निजी सम्पत्तिमा व्यापक क्षति पुगेको भन्दै संस्थाले चिन्ता जनाएको हो ।

नाइमाका अनुसार, बाढीबाट सडक, पुल, विद्युत् तथा सञ्चार पूर्वाधार, सवारीसाधन, बजार क्षेत्र, जलविद्युत् आयोजना र सरकारी तथा सुरक्षा निकायका संरचनामा क्षति पुगेको प्रारम्भिक विवरण आएको छ । इलाका प्रहरी कार्यालय टिमुरे, प्रहरी चौकी स्याफ्रुबेँसी तथा प्रहरी चौकी रसुवागढीसमेत प्रभावित भएको उल्लेख गरिएको छ ।

संस्थाले बाढी प्रभावित नागरिक, परिवार, व्यवसायी, सुरक्षाकर्मी तथा स्थानीय समुदायप्रति सहानुभूति व्यक्त गरेको छ। खोज, उद्धार तथा राहत कार्यमा खटिएका नेपाल प्रहरी, सशस्त्र प्रहरी बल, नेपाली सेना, स्थानीय प्रशासन र उद्धारकर्मीप्रति पनि सम्मान व्यक्त गरिएको छ ।

भोटेकोशी तथा त्रिशूली नदी प्रणालीसँग जोडिएका क्षेत्र जोखिममा रहन सक्ने भएकाले रसुवा, नुवाकोट, धादिङ, गोरखा र चितवनलगायत सम्भावित प्रभावित क्षेत्रका नागरिकलाई सतर्क रहन नाइमाले आग्रह गरेको छ । सम्बन्धित निकायबाट जारी सुरक्षा सूचना तथा निर्देशन पालना गर्न पनि अनुरोध गरिएको छ ।

उद्धार, राहत र पुनर्स्थापनाका प्रयासमा सरकारी तथा सुरक्षा निकायसँग आवश्यक सहकार्य गर्न तयार रहेको नाइमाले जनाएको छ ।