खबरमुकाम । सुरक्षा निकायले काठमाडौं उपत्यकाको सुरक्षा व्यवस्था कडा पारेका छन् । बिहीबार एकै दिन दुई समूहबाट हुन लागेको प्रदर्शनलाई ध्यानमा राखेर काठमाडौं उपत्यकाको सुरक्षा व्यवस्था कडा पारिएको हो । 

काठमाडौं भित्रिने मुख्य नाकामा प्रहरीले जाँचमा कडाइ गरेको छ । प्रहरीले उपत्यका प्रवेश गर्ने नाकामा विशेष जाँच गर्न थालेको जिल्ला प्रहरी परिसर काठमाडौंका एसपी कुमोद ढुंगेलले जानकारी दिए ।

उनका अनुसार गाडीमा चेकजाँचसहित आवश्यक शान्ति सुरक्षाका लागि सबै संयन्त्र परिचालन गरिएको छ । मुख्य नाका थानकोटमा गाडी रोकेर जाँच गर्न थालिएको उनले बताए ।

काठमाडौंका अन्य नाकामा पनि कडाइ गरिएको छ । दुई समूहको प्रदर्शनलक्षित गरी काठमाडौं र लिलितपुरका विभिन्न ठाउँलाई निषेधित क्षेत्र घोषणा गरिएको छ । 

दुई पक्षबीच मुठभेड र झडप हुन सक्ने सम्भावनालाई मध्यनजर गरी माइतीघर मण्डलादेखि बानेश्वर, प्रधानमन्त्री र राष्ट्रपति निवास वरपरलगायत पुल्चोक क्षेत्रमा जुलुस, धर्ना, घेराउ, अनसन, सभाजस्ता आन्दोलन वा विरोधका कार्यक्रम गर्न नपाउने गरी निषेध आदेश जारी गरिएको छ । 

बिहिबार नेकपा एमाले निकट युवा संघ र व्यवसायी दुर्गा प्रसाईंको नेतृत्वको समूहले काठमाडौंको तीनकुने र बल्खुमा प्रदर्शन गर्दै छ ।