नुवाकोट । नुवाकोटको विदुर नगरपालिका–१०, बेत्रावतीमा भोटेकोशी नदीको बाढीले पुरिएको एउटै घरभित्र २३ जनाको शव फेला परेको छ । मंगलबार खोजतलासका क्रममा घरको एउटै कोठामा २१ जना र बाहिरपट्टि थप दुई जनाको शव फेला परेको उद्धारमा संलग्न एक प्रहरी अधिकारीले जानकारी दिए ।

गएको बुधबार भोटेकोशी हुँदै त्रिशूली नदीमा आएको भीषण बाढीले तीनतले घर पुरेको थियो । बाढीबाट जोगिन घरको माथिल्लो तलामा पुगेका मानिसहरू बाढीको चपेटामा परेको हुनसक्ने प्रहरीको प्रारम्भिक अनुमान छ ।

फेला परेका शवको हालसम्म पहिचान हुन सकेको छैन । ती शव गोसाइँकुण्ड जाने तीर्थयात्रीहरूको हुनसक्ने अनुमान गरिएको छ । शवसँगै झोलासमेत भेटिएकाले उनीहरू तीर्थयात्रामा हिँडेका हुनसक्ने प्रहरीको भनाइ छ । फेला परेका शवमध्ये एक जना विदेशी नागरिकको जस्तो देखिएको उद्धारमा संलग्न प्रहरी अधिकारीले बताए ।

उनका अनुसार घरको छतभन्दा मुनिको कोठामा शवहरू फेला परेका हुन् । एक महिलाले सानी बालिकालाई अँगालोमा च्यापेकै अवस्थामा शव भेटिएको छ । उनीहरू आमाछोरी हुनसक्ने अनुमान गरिएको छ ।

बाढी बढ्दै गएपछि ज्यान जोगाउन एकै ठाउँमा जम्मा भएका बेला घरसहित उनीहरू बाढीले पुरेको हुनसक्ने घटनाको प्रकृतिले देखाएको प्रहरीको भनाइ छ ।

फेला परेका २३ शवमध्ये आठवटा सोमबार साँझ त्रिशूली अस्पताल लगिएको छ । बाँकी १५ शव भने अहिले पनि घरको छतमै रहेको र ती शव मंगलबार अस्पताल ल्याउने तयारी भइरहेको प्रहरीले जनाएको छ ।