काठमाडौं । मुक्तिनाथ विकास बैंक र नेपाल यातायात व्यवसायी महासंघबीच यातायात व्यवसायीलाई आवश्यक वित्तीय सेवा तथा कर्जा सहज रूपमा उपलब्ध गराउने सम्बन्धमा व्यावसायिक सम्झौता भएको छ ।

सम्झौताअनुसार महासंघमा आबद्ध सदस्यहरूले यातायात व्यवसाय सञ्चालन तथा विस्तारका लागि आवश्यक सवारीसाधन खरिद गर्न र व्यवसाय सञ्चालनका लागि आवश्यक व्यावसायिक कर्जा लिन सक्नेछन् ।

सम्झौतापत्रमा मुक्तिनाथ विकास बैंकका प्रमुख कार्यकारी अधिकृत तारा मानन्धर र नेपाल यातायात व्यवसायी महासंघका अध्यक्ष माधवप्रसाद नेपालले हस्ताक्षर गरेको बैंकले जनाएको छ ।

सम्झौताअनुसार महासंघमा आबद्ध सदस्यहरूलाई यातायात व्यवसायका लागि आवश्यक सवारीसाधन खरिद तथा सोसम्बन्धी व्यवसाय सञ्चालनका लागि बैंकले आफ्ना १७६ वटै शाखा कार्यालयमार्फत आकर्षक सहुलियत ब्याजदरमा कर्जा सुविधा उपलब्ध गराउनेछ । 

यस सहकार्यबाट यातायात व्यवसायीहरूले सेवा विस्तारका लागि सहज रूपमा वित्तीय सेवा प्राप्त गर्न सक्ने तथा व्यवसाय विस्तारमा थप सहयोग पुग्ने अपेक्षा गरिएको बैंकले जनाएको छ ।

यसैगरी, मुक्तिनाथ विकास बैंकले हाल अटो कर्जा, कृषि तथा एसएमई कर्जामा समेत न्यूनतम ब्याजदरमा कर्जा प्रवाह गर्ने विशेष अफर ल्याएको जनाएको छ ।