काठमाडौँ । जिल्ला अस्पताल लमजुङमा उपचारका क्रममा आमा र शिशुको मृत्यु भएपछि परिवारले अस्पतालमा प्रदर्शन गरेका छन् ।

लमजुङको मर्स्याङ्दी गाउँपालिका वडा नम्बर ९ पामचोककी २६ वर्षीया शोभा विकको उपचारको क्रममा मृत शिशु जन्मिएको र उपचारको क्रममा सुत्केरीको पनि मृत्यु भएपछि परिवारले प्रदर्शन गरेका हुन् ।

अस्पताल व्यवस्थापन समिति अध्यक्ष, अस्पताल प्रशासन प्रमुख, मृतकका आफन्त र प्रशासनबिच छलफलमा चलिरहेको छ । पीडित पक्ष र अस्पतालबिचको छलफल अन्तिम चरणमा पुगेको प्रमुख जिल्ला अधिकारी रामकृष्ण अधिकारीले जानकारी दिए ।

‘बिहानदेखी नै दुबै पक्षबीच छलफल भइराखेको छ । छानबिन समिति गठन गरेर जाने गरी दुबै पक्ष सहमति नजिक पुगेका छन् । छानबिन गरेर दोषीलाई कारवाही गर्ने गरी समिति बनाएर अगाडि बढ्छौ,’ उनले भने ।