काठमाडौं । पाल्पा, निस्दी गाउँपालिका–३ क्यामरुङ् बस्ने श्याम बहादुर पल्लीको घरमा शनिबार दिउँसो आगलागी हुँदा ९ महिनाकी दिप्साना पल्लीको जलेर मृत्यु भएको छ । साथै उक्त आगो फैलिएर सोही घरसँग जोडिएको गोठमा समेत आगलागी हुँदा करिब ७ लाख ५० हजार रूपैयाँ बराबरको धनमाल जलेर नष्ट भएको छ ।    

झापा, भद्रपुर नगरपालिका–८ बस्ने चुडामणी उप्रेतीको घरको माथिल्लो तलामा पानीको ट्याङ्की राख्न फलामको रड वेल्डीङ गर्ने क्रममा एसवाई प्यानलको फर्ममा शनिबार दिउँसो आगलागी हुँदा एसवाई प्यानलबाट बनेको २ वटा कोठा र फर्म जलेर करिब १४ लाख रूपैयाँ बराबरको धनमाल नष्ट भएको छ ।  

यसैगरी झापा, दमक नगरपालिका–३ स्थित बेलडाँगी भुटानी शरणार्थी शिविर सेक्टर ऋद्ध बस्ने भिम बहादुर घिमिरेको घरमा विद्युत सर्ट भई आइतबार बिहान आगलागी हुँदा घर पूर्णरूपमा जलेर करिब ५ लाख रूपैयाँ बराबरको धनमाल नष्ट भएको छ । 

खोटाङ, दिप्रुङ चुइचुम्मा गाउँपालिका–७ टेम्मा बस्ने ५६ वर्षीय राम बहादुर सार्कीको घरमा विद्युत सर्ट भई शनिबार दिउँसो  आगलागी हुँदा  घर पूर्णरूपमा जलेर करिब ७ लाख रूपैयाँ बराबरको धनमाल नष्ट भएको छ । 

प्रहरीले स्थानीय वासिन्दा र दमकलको सहयोगमा आगलागी नियन्त्रणमा लिनुका साथै यस सम्बन्धमा आवश्यक अनुसन्धान गरिरहेको छ ।