काठमाडौं ।  झापामा रहेको एक विद्यालयमा हाइड्रोजन ग्यास सिलिण्डर पड्किँदा दुई जना घाइते भएका छन् । 

सोमबार बिहान सवा १० बजे बिर्तामोड नगरपालिका वडा नम्बर ७ राधाकृष्‍ण टोलमा रहेको बेल्स मोडल इंग्लिस बोर्डिङ स्कुलको प्राङ्‍गणमा हाइड्रोजन ग्यास सिलिण्डर पड्किएको जिल्ला प्रहरी कार्यालय झापाले जानकारी दिएको छ । 

प्रहरीका अनुसार ग्यास सिलिण्डर पड्किँदा दुई जना घाइते भएका छन् । स्कुलमा खेलकुद दिवसका अवसरमा कार्यक्रम थियो । त्यसका लागि बेलुन फुलाउन एउटा हाइड्रोजन ग्‍यास सिलिण्डर ल्याइएको थियो । 

बेलुन फुलाउने क्रममा एक्कासी सिलिण्डर पड्किएको प्रहरीले बताएको छ । सिलिण्डर पड्किएर डेकुरेसन सिलगुढी संस्थाबाट खटिएका भारतीय नागरिक ५४ वर्षीय गणेश सहनी गम्भीर घाइते छन् । उनको दाहिने खुट्टाको भाग चुडिएको छ । उनको उपचारको लागि बिएण्डसी अस्पताल लगिएको प्रहरीले जनाएको छ । 

सिलिण्डर पड्कँदाको ठूलो आवाजले गर्दा कक्षा ९ मा पढ्ने बिर्तामोड–७ की १५ वर्षीय कुसुम तामाङको कानमा समस्या आएको छ । उनको उपचारको लागि पनि बिएण्डसी अस्पतालमा पठाइएको छ । उनको अवस्था सामान्य छ ।