काठमाडाैं । हेटौँडास्थित भुटनदेवी मावि मतदान केन्द्रमा मतदान चलिरहेको छ । बिहान ९ बजेबाट दिउँसो १ बजेसम्म तीन सय ३८ जनाले मतदान गरिसकेका छन् ।

बागमती प्रदेश निर्वाचन अधिकृत श्रीप्रसाद सञ्जेलले जानकारी दिएअनुसार कुल तीन सय ४७ जना मतदाता रहेकामा अहिलेसम्म तीन सय ३८ जनाले मतदान गरिसकेका हुन् ।

प्रदेश सभा सदस्यतर्फ एक सय १० मध्ये एक सय पाँचजना तथा स्थानीय तहका प्रमुख र उपप्रमुख गरी दुई सय ३७ मतदातामध्ये दुई सय ३३ जनाले मतदान गरेका छन् ।

निर्वाचन अधिकृत सञ्जेलले ३ बजेसम्म मतदानको समय तोकिएकाले ३ बजेसम्म नै मतदानका लागि पर्खने बताएका छन् ।

फागुन २० गतेबाट रिक्त हुने राष्ट्रिय सभाको १९ सिटमध्ये बागमती प्रदेशअन्तर्गत अन्य, महिला, अल्पसंख्यक÷अपांगता र दलित गरी चार सिटमा निर्वाचन प्रक्रिया जारी रहेको छ ।

निर्वाचनका लागि सत्तागठबन्धनका तर्फबाट कांग्रेसका दुई तथा माओवादी र एकीकृत समाजवादीका एक–एकजनाले उम्मेदवारी दिएका छन् भने एमालेका चार, राप्रपाका तीन तथा नेमकिपाका चारजना उम्मेदवार रहेका छन् ।