शालिग्राम नेपाल 

देवघाट -  (चितवन) । तीन जिल्लाको सङ्गम देवघाटधाम मेलामा साउन महिनामा एक लाख ३० हजार भक्तजन सहभागी भएका छन् । साउन पहिलो साता सामान्य भक्तजन सहभागी भएको मेलामा त्यसपछिका सोमबार बोलबम आउनेको संख्या वृद्धि भएको देवघाट क्षेत्र विकास समितिका कार्यकारी निर्देशक सदन बरालले जानकारी दिएका छन  । ‘पहिलो सोमबार भक्तजन खासै सहभागी हुन सकेका थिएनन्, सिमलतालमा बस दुर्घटना भएपछि त्रासले धेरै सहभागी हुन सकेको थिएन’ कार्यकारी निर्देशक बरालले भनेका छन , ‘त्यसपछि सहभागीको संख्या वृद्धि भएर आयो ।’

अन्तिम सोमबार मात्र ५० हजार भक्तजन सहभागी भएको हाम्रो विवरणमा उल्लेख छ, उनले भनेका छन । अन्तिम सोमबार बिहान ४ बजेदेखि स्नान गर्न भक्तजनको उपस्थिति रहेको  थियो । देवघाटधाममा चितवन, नवलपरासी, मकवानपुर, तराईका जिल्ला, भारतको विहार, उत्तर प्रदेश, रुपन्देहीलगायतका स्थानबाट भक्तजन आउने गरेको देवघाट क्षेत्र विकास समितिले जानकारी दिएको छ । स्नान गर्न आउने भक्तजनलाई नाउ, उद्धार टोली, बोटको व्यवस्था, आपतकालीन सुरक्षाका सबै उपाय अपनाएको थियो ।
                                                                                                                          स्रोत:  गोरखापत्र अनलाइन