काठमाडौं । मधेश प्रदेशका सभामुख रामचन्द्र मण्डलले सिंहदरबारलाई प्रदेश र गाउँतिर पठाउनु गौरवको विषय भएको बताए । 

राजधानीमा आयोजित अप्सरा गौतमद्वारा प्रकाशित ‘गाउँगाउँमा सिंहदरबार’ पुस्तकको विमोचन समारोहमा विशिष्ठ अतिथिको रुपमा बोल्दै सभामुख मण्डलले हिजोको दिनमा सिंहदरबारबाट नै नीति, नियम बन्ने र बजेट पनि बिनियोजन हुने तर अहिले सिंहदरबारको अधिकार प्रदेश र गाउँमा गएकाले त्यसलाई गाउँगाउँमा सिंहद्रबार भनिएको बताए ।

सभामुख मण्डलले संविधानमा उल्लेख गरिएका अधिकारलाई जनतामा बाँड्नुपर्ने बताए । उनले संविधान सबैको साझा भएकाले त्यसलाई सबैले स्विकार्नुपर्ने बताए । उनले कुनै दललाई आवश्यक परे दुई तिहाई ल्याएर संविधान संशोधन गर्न पनि सुझाव दिए ।
 

उनले केन्द्र र प्रदेशले अरुको अधिकारमाथि हस्तक्षेप गरेको आरोप लगाए । ‘संघले प्रदेशको र प्रदेशले अरुको अधिकार मिचेको छ’ सभामुख मण्डलले भने ‘संविधानमा साझा अधिकारको सूची छ तर केन्द्रले नै कानुन बनाइदिन्छ, यो मिचेको होइन र ? । उनले केन्द्रको अधिकार भत्काउन सकेमात्रै संघीयता कार्यान्वयनमा सहजता हुने बताए ।

उनले प्रदेशलाई पनि आफ्नो क्षमता देखाउन आग्रह गरे । उनले केन्द्रीय सरकारले बढी बजेट राख्ने गरेकाले पनि प्रदेश र स्थानीय तहलाई आर्थिक रुपमा समस्या परेको बताए । उनले संविधानमा उल्लेखित साझा अधिकारका सूचीलाई व्यवस्थित गर्न साझा संयन्त्र बनाउनुपर्नेमा जोड दिए ।

सभामुख मण्डलले संघीयता, संविधान, संघीय व्यवस्था, प्रदेश सरकार्का साथै स्थानीय तहलाई जोडेर पुस्तक प्रकाशन गरेकोमा प्रकाशक र पुस्तककी सम्पादक अप्सरा गौतमको प्रशंसा गरे । प्रदेशका मुख्यमन्त्री, सभामुख, प्रदेश प्रमुख, संविधानविद्, पूर्वमन्त्री, पत्रकार, संघीयताविद्, सांसद र विषयविज्ञ गरी ३३ जनाको लेख यस पुस्तकमा प्रकाशित गरिएको छ । ३ सय पृष्ठको पुस्तकले तीनै तहको सरकारको विषयवस्तु समेटेको छ ।