काठमाडौं । सरकारले एकै पटक आधा दर्जन अध्यादेश ल्याउने निर्णय गरेपछि राष्ट्रपति रामचन्द्र पौडेल दबाबमा परेका छन् । विभिन्न दीर्घकालीन महत्वका अध्यादेश प्रमाणिकरणका लागि शीतल निवासमा पुगेपछि राष्ट्रपति पौडेल दबाबमा परेका हुन् । 

सरकारले आव्हान भइसकेको संसदको अधिवेशन नै रोकेर अध्यादेश ल्याएपछि विपक्षी दलहरुले चर्को आलोचना गरेको एवम् अध्यादेश पारित नगर्न आग्रह गरेपछि राष्ट्रपति पौडेलले कानुनविद्हरुसँग परामर्श गर्न लागेका छन् । राष्ट्रपति पौडेलले आज दिउँसो ४ बजे छलफलका लागि कानुनविद्हरूलाई बोलाएका हुन् । 

छलफलमा महान्यायाधिवक्तासँगै संवैधानिक कानुनका जानकारहरूलाई खबर गरिएको राष्ट्रपति कार्यालयले जनाएको छ । अध्यादेश जारी गर्ने कि नगर्ने भन्ने निर्णय लिनुअघि राष्ट्रपति पौडेलले कानुनविद्हरूसँग परामर्श लिन लागेका राष्ट्रपति कार्यालय स्रोतले जनाएको छ ।