काठमाडौं । सरकारले विस्थापित सुकुम्बासीले आफ्नो व्यवस्था आफैं गर्नु पर्ने निर्णय गरेको छ । सुकुम्बासी बस्ती हटाउँदा विस्थापनमा परेकाहरुलाईलाई पुनर्स्थापनाका लागि प्रति परिवार २५ हजार दिने निर्णय गर्दै आफ्नो व्यवस्था आफैं गर्न भनेको हो । 

मंगलबार सिंहदरबारमा बसेको मन्त्रिपरिषद्को बैठकका निर्णय सुनाउँदै सरकारका प्रवक्ता सस्मित पोखरेलले विस्थापित भएका परिवारलाई सरकारले एकमुष्ट २५ हजार उपलब्ध गराउने बताए । उनका अनुसार त्यस्ता परिवारलाई सरकारले खानपानका लागि तीन महिनासम्म प्रति महिना १५ हजारका दरले रकम उपलब्ध गराउने छ । पाँच जनासम्म सदस्य भएको परिवारलाई मासिक १५ हजार र त्यसभन्दा बढी सदस्य भएको परिवारका हकमा थप प्रतिसदस्य २ हजार रुपैयाँ उपलब्ध गराइने उनको भनाइ रहेको छ । 

पोखरेलले विस्थापित बालबालिका, वृद्ध–अशक्त तथा बिरामीहरूको हकमा होल्डिङ सेन्टर रहेको स्थानीय तहसँग समन्वय गरेर सेवा प्रवाह गरिने बताए । उनले आवश्यक परिवार सङ्ख्याको यकिन गरेर मात्रै सरकारले रकम उपलब्ध गराउने स्पष्ट पारे ।