काठमाडौं । देशभरको मौसममा हाल पश्चिमी न्यून चापीय प्रणाली, स्थानीय वायु र पूर्वीय वायुको संयुक्त प्रभाव देखिएको छ । यसका कारण विभिन्न क्षेत्रमा आंशिकदेखि सामान्य बदलीको अवस्था रहेको छ ।

आज दिनभर हिमाली तथा पहाडी भूभागमा आंशिक बदली रहने अनुमान गरिएको छ  कोशी, बागमती र गण्डकी प्रदेशका पहाडी तथा हिमाली क्षेत्रका केही स्थानमा चट्याङसहित वर्षा हुन सक्ने सम्भावना छ । त्यस्तै लुम्बिनी, कर्णाली र सुदूरपश्चिमका उच्च पहाडी क्षेत्रका सीमित स्थानमा पनि पानी पर्ने संकेत गरिएको छ ।

तराई क्षेत्रमा भने मौसम अधिकांश समय खुला रहने भए पनि कोशी प्रदेशका केही स्थान तथा मधेस, बागमती र गण्डकी प्रदेशका एक–दुई स्थानमा मेघगर्जन र चट्याङसहित वर्षा हुन सक्ने अनुमान छ । यता लुम्बिनी र सुदूरपश्चिमका तराई जिल्लाहरूमा तापक्रम बढ्ने तथा तातो महसुस हुने सम्भावना रहेको छ ।

रातिको समयमा पनि पहाडी तथा हिमाली क्षेत्रमा आंशिक बदली कायम रहनेछ । कोशी प्रदेशका केही स्थानमा मध्यम वर्षा हुन सक्ने सम्भावना रहेको छ भने बागमती र गण्डकी प्रदेशका उच्च भूभागका थोरै स्थानमा हल्का वर्षा हुन सक्छ । कोशी प्रदेशको तराई क्षेत्रमा समेत राति चट्याङसहित वर्षा हुन सक्ने अनुमान गरिएको छ ।

मौसममा हुन सक्ने परिवर्तनलाई ध्यानमा राख्दै वर्षा र चट्याङ प्रभावित क्षेत्रमा आवश्यक सावधानी अपनाउन आग्रह गरिएको छ ।