काठमाडौं । राष्ट्रिय वाणिज्य बैंकको पूर्ण स्वामित्वमा स्थापित सहायक कम्पनी आरविवि सेक्युरिटिज कम्पनीको धितोपत्र कारोबार (ब्रोकर)  बुधबारबाट सञ्चालनमा आएको छ । धितोपत्र दलालके रुपमा ग्राहकलाई उच्चस्तरीय ब्रोकरेज सेवा प्रदान गर्ने लक्ष्य राखेको कम्पनीको कुल चुक्ता पुँजी २० करोड रुपियाँ रहेको छ । 

आरविविले नेपाल धितोपत्र बोर्डबाट गत वर्ष साउन ३२ गते धितोपत्र कारोबारका लागि स्वीकृति प्राप्त गरेको थियो भने गत माघ ३ गते नेपाल स्टक एक्सचेन्ज (नेप्से) बाट सदस्यता नम्बर ९७ प्राप्त गरेको थियो । त्यसैगरी कम्पनीले सिडिएस एन्ड क्लियरिङबाट माघ २३ मै राफसाफ सदस्यतासमेत प्राप्त गरिसकेको छ । 
 

ग्राहकहरूलाई गुणस्तरीय सेवा प्रदान गर्ने प्रतिबद्धताका साथ कारोबार सञ्चालनमा ल्याएको कम्पनीले धितोपत्र कारोबारसहित अन्य विशिष्टिकृत सेवा प्रदान गर्ने उद्देश्य राखेको छ ।

कम्पनीले प्रारम्भिक चरणमा ग्राहकलाई धितोपत्र कारोबार सेवा प्रदान गर्ने र भविष्यमा नियामक निकायवाट अनुमति प्राप्त गरी मार्जिन, थोक कारोबार तथा अन्य पुँजीबजारसम्बन्धी सेवा प्रदान गर्नेछ ।