काठमाडौं । मुक्तिनाथ विकास बैंक र नेपालमा टाटा गाडीको आधिकारिक विक्रेता सिप्रदी ट्रेडिङ प्रालिबीच व्यावसायिक सवारीसाधन खरिदका लागि कर्जा उपलब्ध गराउने सम्बन्धमा समझदारी भएको छ ।

सम्झौतामा मुक्तिनाथ विकास बैंकका प्रमुख कार्यकारी अधिकृत तारा मानन्धर र सिप्रदी ट्रेडिङका भाइस प्रेसिडेन्ट सौरभ राज थपलियाले हस्ताक्षर गरेका छन् । सम्झौताअनुसार सिप्रदी ट्रेडिङका आधिकारिक डिलरमार्फत टाटा ब्रान्डका पिकअप तथा व्यावसायिक साना सवारीसाधन खरिद गर्न चाहने ग्राहकलाई बैंकले कर्जा सुविधा उपलब्ध गराउनेछ ।

बैंकले आफ्ना १७६ वटै शाखा कार्यालयबाट आकर्षक सहुलियत ब्याजदरमा यस्तो कर्जा सुविधा उपलब्ध गराउने जनाएको छ । सम्झौताअनुसार विद्युतीय सवारीसाधन खरिदका लागि अधिकतम ६० प्रतिशतसम्म र आन्तरिक दहन इन्जिन (आईसीई) सवारीसाधनका लागि अधिकतम ७० प्रतिशतसम्म कर्जा उपलब्ध हुने व्यवस्था गरिएको छ ।

यो सहकार्यबाट व्यवसाय, कृषि तथा साना उद्यमका लागि व्यावसायिक सवारीसाधन खरिद गर्न चाहने ग्राहकलाई सहज वित्तीय पहुँच पुग्ने बैंकको अपेक्षा छ । सवारीसाधन खरिदमार्फत व्यवसाय विस्तार गर्न चाहने ग्राहकलाई यसबाट थप सहयोग पुग्ने बैंकले जनाएको छ ।

यसैगरी, बैंकले अटो कर्जा, कृषि कर्जा तथा साना तथा मझौला उद्यम कर्जामा न्यूनतम ब्याजदरमा विशेष अफरसमेत ल्याएको जनाएको छ ।