काठमाडौं । १८औँ संस्करणको नाडा अटो शो २०२६ आजदेखि काठमाडौँको प्रदर्शनीमार्गस्थित भृकुटीमण्डपमा सुरु हुँदै छ । अटो शोमा पाँच दर्जनभन्दा बढी अन्तर्राष्ट्रिय अटोमोबाइल ब्रान्डका विभिन्न मोडल प्रदर्शनीमा राखिँदै छन् । यात्रुवाहक सवारीसाधनसँगै कमर्सियल सेग्मेन्टअन्तर्गत ईभी माइक्रो, भ्यानदेखि ठूला व्यावसायिक सवारीसाधनसम्म प्रदर्शन गरिने आयोजकले जनाएको छ ।

हुन्डाई, टाटा, बीवाईडी, दिपल, लिपमोटर, बीएआईसी, होङ्छी, अवतार, एवान, चांगन, चेरी, जिली र स्काइवेललगायत ब्रान्डका उत्पादन अटो शोमा राखिनेछन् । त्यस्तै, रोयल इन्फिल्ड, यामाहा र होन्डालगायत दुईपांग्रे सवारीसाधनका ब्रान्डको समेत सहभागिता रहनेछ ।

यसपटकको अटो शोमा नेपालमै उत्पादन गरिएको सिप्रदी–यात्री नेपालको ‘यात्री पी–२’ पनि प्रदर्शनमा राखिँदै छ । अटोकम्पोनेन्ट, टायर, लुब्रिकेन्ट, स्पेयर पार्ट्स तथा एसेसरिजसँग सम्बन्धित कम्पनीहरूको समेत उल्लेख्य सहभागिता रहने आयोजकले जनाएको छ ।

प्रदर्शनीमा २०० भन्दा बढी स्टल रहनेछन् । नाडाका अनुसार १० भन्दा बढी बैंक तथा वित्तीय संस्थाले समेत अटो शोमा सहभागिता जनाउनेछन् ।

आजदेखि सुरु हुने अटो शो भदौ १४ गतेसम्म सञ्चालन हुनेछ । प्रदर्शनी अवधिमा अटोमोबाइल क्षेत्रसँग सम्बन्धित नीतिगत बहस, लगानी, अटो बीमा, सडक पूर्वाधार, सरकारी नीति, नयाँ सवारीसाधनको बढ्दो आगमन तथा रोजगारीलगायत विषयमा विशेष छलफल कार्यक्रमसमेत आयोजना गरिने आयोजकले जनाएको छ ।