काठमाडौं -   संस्कृति पर्यटन तथा नागरिक उड्डयन मन्त्री बद्रीप्रसाद पाण्डेले पर्यटन क्षेत्रको विकासका लागि सरकारी प्रयासले मात्रै विराट प्रगति गर्न नसकिने बताएका छन् ।

नेपाल पर्यटन बिकास बोर्डले बुधबार गरेको कार्यक्रममा बोल्दै मन्त्री पाण्डेले निजी क्षेत्रलाई पनि पर्यटन क्षेत्रको विकास सहयोग गर्न आग्रह गरेका छन् ।

भिजिट नेपाल अभियानले पर्यटन क्षेत्रलाई उजागर गरेको उनको भनाइ थियो।आग्रह, पूर्वाग्रह नहेरी पर्यटनको विकासका लागि अघि बढ्न उनले आग्रह गरेका थिए ।

उनले परिणाममुखी काम गरेर पर्यटनको क्षेत्रमा चलायमान र गतिशील बनाउन आग्रह गरेका छन् । उनले पर्यटनका क्षेत्रमा नीतिगत, कानुनी, पद्धती वा प्रवृत्तिको कारणले समस्या उत्पन्न भएको हो त्यसको पहिचान गरेर अघि बढ्नुपर्ने पनि बताए ।

नेपाल वायु सेवा निगम लगायतका क्षेत्रमा प्रश्न उठेको बताउँदै उनले के कति कारणले चल्न सकेको छैन भन्दै प्रश्न गरेका छन् ।