साहारा लिम्बू 

ताप्लेजुङको सिदिङ्वा गाउँपालिकामा रहेको ढङढङे झरनाको प्रचार प्रसार अभावले ओझेलमा परेको छ । गाउँपालिकाको वडा ५ लिम्बुदिन र वडा ६ मेहेलेको सङ्गमस्थलमा रहेको झरनाले प्रचार प्रसार पाउन नसकेको हो ।

झरनाको लम्बाइ अहिलेसम्म मापन नगरिएको भए पनि २५० मिटर अग्लो रहेको अनुमान गरिएको सिदिङ्वा गाउँपालिका अध्यक्ष मानबहादुर राईले बताए ।

झरना बर्खायाममा अति नै ठूलो भई ढङढङको आवाज दिने भएकाले यसको नाम ढङढङे झरना राखिएको अध्यक्ष राईको भनाइ छ । 

गाउँपालिकाको यस झरनाको प्रचारप्रसार गरी पर्यटन प्रवर्धन गर्न चाहन्छ । त्यसैले गाउँपालिकाले आगामी आर्थिक वर्षमा झरनाको महोत्सव साथै प्रचार प्रसार गर्न २० लाख बजेट विनियोजन गरिसकेको छ ।