यज्ञप्रसाद सापकोटा

बर्दिया राष्ट्रिय निकुञ्जमा गत साउन महिनादेखि बन्द भएको जिप सफारी खुला गरिएको छ । चाडबाडको समयमा निकुञ्ज घुम्न आउने पर्यटकलाई मध्येनजर गर्दै निकुञ्जले जिप सफारी खुला गरेको हो । 

बर्षा र हावा हुरीको कारणले निकुञ्ज भित्रका सडक अवरुद्ध भएपछि जिप सफारी बन्द गरिएको थियो । हावाहुरीले ढालेका रुखहरू पन्छाएर बाटो मर्मत गरेपछि जिप सफारी खुला गरिएको बर्दिया राष्ट्रिय निकुञ्जका संरक्षण अधिकृत एवं सूचना अधिकारी सरोजमणि पौडेलले बताए । 

निकुञ्ज परिसर बाहेक निकुञ्जभित्र घुम्न प्रायः जिप सफारीमा घुम्न पर्यटकहरू मन पराउने गर्दछन् । निकुञ्ज घुम्न आउने आन्तरिक तथा बाह्य पर्यटकहरूले जिप सफारी गर्न पाउनु पर्ने माग गर्दैआएका थिए । जिप सफारी निकुञ्ज घुम्न सुरक्षित र सहज मान्ने गरिन्छ । 

पर्यटकलाई लक्षित गरी बर्दियामा ३० वटाभन्दा बढी साना ठुला  होटल तथा रिसोर्ट व्यवसाय सञ्चालनमा रहेका छन् । निकुञ्ज आसपासको क्षेत्रमा होमस्टेहरू पनि सञ्चालनमा छन् ।  निकुञ्जमा जिप सफारी गराउन होटल तथा पर्यटन व्यवसायीले ४१ वटा जिप दर्ता गरेका छन् । एक पटक जिप सफारी गर्दा बर्दिया राष्ट्रिय निकुञ्जले तीन हजार रुपियाँ राजस्व लिने गरेको छ । चाडको समयमा विशेषगरी निकुञ्ज घुम्न आउने आन्तरिक र सार्क राष्ट्रको पर्यटकको संख्या बृद्धि हुने गर्दछ । 

बाघ, हात्ती, गैँडा, जरायो, चित्तल, बाह्रसिङ्गा लगायतका वन्यजन्तुहरू सहजै देख्न सकिने भएको हुनाले हरेक बर्ष निकुञ्ज घुम्न आउने पर्यटकको संख्यामा बृद्धि हुँदै गएको छ । संरक्षित वन्यजन्तुको सुचिमा रहेको मात्र ११ प्रकारका स्तनधारी, ६ प्रकारका पन्छी र तीन प्रकारका घस्रने जनावर पाइन्छन् । 

गत आर्थिक बर्ष २०८१–८२ मा २८ हजार ६७ जना पर्यटक निकुञ्ज प्रवेश गरेका छन् । अघिल्लो आर्थिक बर्ष २०८०–८१ मा २६ हजार एकसय ३१ जना पर्यटक प्रवेश गरेका थिए । आर्थिक बर्ष २०७९–८० मा २४ हजार तीनसय ९८ जना पर्यटकले निकुञ्ज भ्रमण गरेका थिए ।

संख्यामा बृद्धि भएसँगै पर्यटक प्रवेशबाट उठ्ने राजस्वमा समेत वृद्धि भएको छ । आर्थिक बर्ष २०८१–८२ मा पर्यटकबाट मात्र तीन करोड २६ लाख राजस्व निकुञ्जमा उठेको देखिन्छ । आर्थिक बर्र्ष २०८०–८१ दुई करोड ८४ लाख राजस्व पर्यापर्यटनबाट प्राप्त भएको छ । 

आन्तरिक पर्यटकलाई निकुञ्ज प्रवेश गर्न एकसय, सार्क मुलुकका पर्यटकलाई सात सय ५० र अन्य मुलुकका पर्यटकका लागि एक  हजार ५ सय शुल्क लाग्ने गरेको सूचना अधिकारी पौडेलले बताए ।  

यस बर्ष निकुञ्ज घुम्नका लागि आन्तरिक तथा बाह्य पर्यटकहरूले बुकिङ्ग गर्ने काम सुरु भइसकेको पर्यटन व्यवसायी रामजी थापाले बताए । अफ सिजन भए पनि छिटपुट पर्यटक अहिले पनि आइरहेको बताउँदै चाडबाडको समयमा नेपाली पर्यटकको चाप बढ्दै जाने उनले बताए ।