काठमाण्डौ । बाढीका कारण अवरुद्ध भएको खोटाङको दिक्तेल–चखेवाभञ्ज्याङ सडक पुनः सञ्चालनमा आएको छ । दिक्तेल रुपाकोट मझुवागढी नगरपालिका–८ स्थित पङ्खुखोलामा आएको बाढीले मध्यपहाडी लोकमार्गअन्तर्गतको उक्त सडक अवरुद्ध भएको थियो । गत शुक्रबार परेको वर्षापछि माथिल्लो क्षेत्रबाट लेदोसहित आएको बाढीले करिब २५ मिटर सडक बगाउँदा यातायात सेवा प्रभावित बनेको थियो ।

अवरुद्ध सडक दिक्तेल रुपाकोट मझुवागढी नगरपालिका, नेपाली सेनाको रणभीम गण मुडे ब्यारेक, जिल्ला प्रहरी कार्यालय खोटाङ तथा स्थानीयवासीको संयुक्त पहलमा पुनः सञ्चालनमा ल्याइएको हो ।

सडक सञ्चालनमा आएपछि भोजपुरबाट दिक्तेल हुँदै काठमाण्डौतर्फ तथा काठमाण्डौबाट दिक्तेल हुँदै भोजपुरतर्फ आवतजावत गर्ने सवारी साधन पुनः सञ्चालनमा आएका छन् । जिल्ला प्रहरी कार्यालय खोटाङका सूचना अधिकारी एवं प्रहरी निरीक्षक निराजन बस्नेतले सडक खुलिसकेको र यातायात सेवा नियमित बन्दै गएको जानकारी दिए ।

उता, पङ्खुखोलामा २०७३ सालमै मोटरेबल पक्की पुल निर्माण गर्ने योजना सुरु भए पनि हालसम्म निर्माण सम्पन्न हुन सकेको छैन। निर्माण कम्पनी र ठेकेदार पक्षको ढिलासुस्तीका कारण पुल अलपत्र परेपछि स्थानीयवासी तथा सवारी साधनलाई अहिले पनि खोलाबाटै आवतजावत गर्नुपर्ने बाध्यता रहेको छ ।

स्थानीयवासीले वर्षायाममा बारम्बार सडक अवरुद्ध हुने समस्या समाधानका लागि पुल निर्माण कार्य तत्काल सम्पन्न गर्न सम्बन्धित निकायसँग माग गरेका छन् ।