काठमाडौं । प्रतिनिधिसभाको बुधबारका लागि निर्धारित बैठक निर्धारित समयमै सुरु हुन सकेको छैन । बिहान ११ बजे बोलाइएको बैठक एक घण्टाभन्दा बढी समय बितिसक्दा पनि सञ्चालन हुन नसकेको हो ।

संसद् सचिवालयका प्रवक्ता एकराम गिरीका अनुसार विपक्षी दलहरूको असहमति कायम रहेकाले सहमतिको प्रयास जारी रहेको र त्यसकै कारण बैठक सुरु हुन ढिलाइ भएको हो ।

सदनको अवरोध हटाउने उद्देश्यले सभामुख डोलप्रसाद अर्याल, राष्ट्रिय स्वतन्त्र पार्टीका सभापति रवि लामिछाने तथा विपक्षी दलका नेताहरूबीच निरन्तर संवाद भइरहेको बताइएको छ ।

विपक्षी दलहरूले नेपाल–भारत सीमासम्बन्धी विषयमा प्रधानमन्त्री वालेन्द्र शाहले सदनमा दिएको अभिव्यक्तिप्रति आपत्ति जनाउँदै आएका छन् । उनीहरूले प्रधानमन्त्री स्वयंले संसद्मा उपस्थित भई उक्त विषयमा स्पष्ट धारणा राख्नुपर्ने तथा विवादित भनिएको अभिव्यक्ति संसद्को अभिलेखबाट हटाउनुपर्ने माग गरेका छन् ।

प्रधानमन्त्री शाहले जेठ १७ गतेको प्रतिनिधिसभा बैठकमा सांसदहरूको प्रश्नको जवाफ दिने क्रममा उक्त अभिव्यक्ति दिएका थिए । त्यसयता सदनको कार्यसूची प्रभावित बन्दै आएको छ र नियमित रूपमा बैठक सञ्चालन हुन सकेको छैन ।

दलहरूबीच सहमति जुटाउने प्रयास जारी रहेकाले बैठक कहिले सुरु हुन्छ भन्नेबारे तत्काल कुनै निश्चित जानकारी सार्वजनिक गरिएको छैन ।