काठमाडौं । नेपाली कांग्रेसले प्रधानमन्त्री बालेन्द्र शाहको अभिव्यक्तिलाई लिएर जारी संसद अवरोध अन्त्य गर्न सकिने संकेत गरेको छ । प्रतिनिधिसभाको बुधबारको बैठकमा बोल्दै कांग्रेस संसदीय दलका नेता भीष्मराज आङ्देम्वेले प्रधानमन्त्रीले दिएको अभिव्यक्तिको विषयलाई लिएर संसदलाई लामो समयसम्म बन्धक बनाइराख्न नहुने बताएका हुन् ।

आङ्देम्वेले देशका महत्वपूर्ण विषय र जनतासँग जोडिएका मुद्दाहरू संसदको प्राथमिकतामा पर्नुपर्ने उल्लेख गर्दै संसदको बहुमूल्य समय खेर जान नहुने धारणा राखे ।

संसदमा सम्बोधन गर्दै उनले प्रधानमन्त्रीप्रति कटाक्षसमेत गरे । प्रधानमन्त्री फेरि कुनै दिन अप्रत्याशित रूपमा उपस्थित भएर विवादास्पद व्यवहार दोहोर्याउन सक्ने आशंका आफूलाई लागेको भन्दै उनले अब प्रधानमन्त्रीको उपस्थितिको प्रतीक्षा नगर्ने बताए ।

उनले भने, “मेरो मुलुकका सवालहरू प्रधानमन्त्रीको उपस्थितिभन्दा पनि ठूलो छन् । उहाँले बोलेका विषयमै केन्द्रित भएर संसदलाई निरन्तर अवरुद्ध गर्नु उचित हुँदैन ।”

कांग्रेसले यसअघि प्रधानमन्त्री शाहले संसदमा दिएको अभिव्यक्तिप्रति आपत्ति जनाउँदै सदन अवरोध गर्दै आएको थियो । तर आङ्देम्वेको पछिल्लो भनाइले संसदको गतिरोध अन्त्यतर्फ कांग्रेस लचिलो बन्ने संकेत गरेको छ ।