काठमाडौं । चर्चित सेफ सन्तोष साहलाई प्रहरीले पक्राउ गरेको छ । उपत्यका अपराध अनुसन्धान कार्यालयको टोलीले उनलाई धनुषाको रामानन्द चोक क्षेत्रबाट नियन्त्रणमा लिएको जनाएको हो ।

प्रहरीका अनुसार सन्तोष साहसँगै उनका दाजु नाता पर्ने नारायण साहलाई पनि पक्राउ गरिएको छ । दुवै जनालाई गएराति नियन्त्रणमा लिएर थप अनुसन्धानका लागि काठमाडौं ल्याइएको बताइएको छ ।

शकुन्तला अधिकारी (थापा)ले दिएको उजुरीका आधारमा ठगीसम्बन्धी कसुरमा अनुसन्धान अघि बढाइएको थियो । सोही प्रकरणमा काठमाडौं जिल्ला अदालतबाट पक्राउ अनुमति प्राप्त भएपछि प्रहरी टोलीले उनीहरूलाई नियन्त्रणमा लिएको हो ।

हाल दुवै जनामाथि सम्बन्धित मुद्दामा थप अनुसन्धान भइरहेको प्रहरीले जनाएको छ ।