काठमाडौं । नेपाली कांग्रेसभित्र संस्थापन इतर धाराका युवा नेताहरूले आज राजधानीमा बृहत् भेला आयोजना गर्दैछन् । पार्टीभित्र देखिएको आन्तरिक विवाद, संगठनात्मक अवस्था तथा भावी नेतृत्वको विषयमा छलफल गर्न कार्यक्रम तय गरिएको हो ।

युवा नेता भुपेन्द्रजंग शाहीका अनुसार भेलाले कांग्रेसको वर्तमान अवस्थाबारे समीक्षा गर्दै पार्टीलाई एकताबद्ध रूपमा अघि बढाउने उपाय खोज्ने प्रयास गर्नेछ । उनले पार्टीभित्र बढ्दो मतभेद र त्यसको समाधानबारे खुला बहस आवश्यक रहेको बताए ।

चाबहिलस्थित नवदुर्गा पार्टी भेन्युमा दिउँसो २ बजेदेखि सुरु हुने कार्यक्रममा विशेष महाधिवेशनमा सहभागी नभएका युवा नेताहरूको उपस्थिति रहने जनाइएको छ । आयोजक पक्षले छलफलका लागि पाँचवटा मुख्य प्रस्ताव अघि सारेको छ ।

भेलामा विशेष महाधिवेशनबाट बनेको समितिको वैधानिकता, भ्रातृ संस्थाहरूमा गरिएको मनोनयन, क्रियाशील सदस्यता व्यवस्थापन, निर्धारित समयभित्र महाधिवेशन सम्पन्न गर्ने विषय तथा नेतृत्वमा पुस्तान्तरणका मुद्दामाथि बहस हुने बताइएको छ ।

युवा नेताहरूले पार्टी संगठनलाई थप लोकतान्त्रिक, पारदर्शी र युवामैत्री बनाउने विषयलाई समेत प्राथमिकतामा राख्ने जनाएका छन् ।