काठमाडौं । राष्ट्रपति रामचन्द्र पौडेलले प्रथम राष्ट्रपति डा. रामवरण यादव र प्रथम उपराष्ट्रपति परमानन्द झासँग समसामयिक राष्ट्रिय विषयमा छलफल गरेका छन् ।

शुक्रबार शीतल निवासमा भएको भेटवार्तामा सुनसरीको देवानगञ्ज गाउँपालिकाको कप्तानगञ्जसहित तराई–मधेशका विभिन्न जिल्लामा देखिएको पछिल्लो अवस्थाबारे विशेष रूपमा कुराकानी भएको राष्ट्रपति कार्यालयले जनाएको छ ।

भेटका क्रममा सहभागीहरूले उक्त घटनाप्रति चिन्ता व्यक्त गर्दै नेपालमा सदियौँदेखि कायम रहेको सामाजिक, धार्मिक तथा जातीय सद्भाव, सहिष्णुता र राष्ट्रिय एकतालाई थप मजबुत बनाउन सबै पक्षले साझा पहल गर्नुपर्नेमा जोड दिएका थिए ।

छलफलका क्रममा प्रथम राष्ट्रपति डा. रामवरण यादवले वर्तमान विषम परिस्थितिमा सरकारले सबै राजनीतिक दल, नागरिक समाज, धार्मिक अगुवा तथा आम नागरिकलाई साथमा लिएर समस्याको समाधानतर्फ प्रभावकारी पहल गर्नुपर्ने धारणा व्यक्त गरेका थिए ।