काठमाडौं । प्रधानमन्त्री पुष्पकमल दाहाल प्रचण्डको सचिवालयका १३ जना कर्मचारीहरु हटाइएको छ । प्रधानमन्त्रको प्रमुख स्वकीय सचिव सन्तकुमार दरैका अनुसार माघ १ गतेबाट लागू हुनेगरी १३ जनालाई हटाएको हो ।

उनले ५ जना उपसचिव, एकजना शाखा अधिकृत, तीनजना प्रशासन सहायक, दुईजना कम्प्युटर सहायक, एकजना कार्यालय सहायक र २ जना हलुका सवारी चालकलाई बिदा गरेको जानकारी दिए ।

प्रधानमन्त्रीको सचिवालयले त्यतिका मात्रामा कर्मचारी हटाएको जानकारी प्रधानमन्त्री तथा मन्त्रिपरिषद् कार्यालयका सचिवलाई दिएको छ ।

प्रधानमन्त्रीले आफ्नो कार्यकाल एक वर्ष पुगेको दिन कार्यशैली सुधारदेखि सचिवालयलाई पनि चुस्त बनाउने घोषणा गरेका थिए । सो घोषणापछि प्रधानमन्त्री कार्यालयका ६८ कर्मचारीको दरबन्दी कटौती गर्ने निर्णय गरेको थियो ।