काठमाडौं । अत्तरिया उद्योग वाणिज्य संघले आयोजना गरेको सुदूरपश्चिम प्रादेशिक महोत्सवमा नक्कली टिकट बिक्रि गरेको अभियोगमा दुई जनाविरुद्ध पक्राउ पुर्जी जारी गरेको छ । 

जिल्ला अदालत कैलालीले उद्योग वाणिज्य संघका सचिव दिलिपकुमार साउँद र दुर्गालक्ष्मी बहुमुखी क्याम्पसका स्ववीयु सभापति भुवन महराका नाममा पक्राउ पुर्जी जारी गरेको हो । अत्तरिया उद्योग वाणिज्य संघका अध्यक्षसहितका ११ जना पदाधिकारीले उनीहरुका नाममा मंगलबार किटानी जाहेरी दिएपछि कारबाही प्रक्रिया अघि बढाउन अदालतले पक्राउ पुर्जी जारी गरेको हो ।

जिल्ला प्रहरी कार्यालय कैलालीका डिएपी कुलदिप चन्दले किटानी जाहेरी दिएका दुवै जनालाई पक्राउ गर्न अदालतबाट पक्राउ पुर्जी पनि जारी भइसकेको बताए । उनीहरुलाई पक्राउ गरेर कारवाही प्रक्रिया अघि बढाउने चन्दले बताए ।

अत्तरियामा पुस २६ गतेदेखि माघ ७ गते सम्म सञ्चालन भएको सुदूरपश्चिम महोत्सवको आठौं दिन २८ वटा नक्कली टिकट ठेली बरामद गरिएको थियोे ।