काठमाण्डौ । कोशी प्रदेशका मुख्यमन्त्री केदार कार्कीले आज शुक्रबार मन्त्रिपरिषद् विस्तार गर्ने भएका छन् । प्रदेश प्रमुखको कार्यालयका अनुसार दिउँसो ४ बजे शपथ हुने तय भइसकेको छ । १ राज्यमन्त्रीसहित ५ जना मन्त्री बनाउने मुख्यमन्त्री कार्कीको तयारी छ ।

मुख्यमन्त्री कार्यालय स्रोतका अनुसार नयाँ थप हुने मन्त्रीहरूमा कांग्रेसबाट प्रदीपकुमार सुनुवार - स्वास्थ्य, रामकुमार खत्री - कृषि उद्योग तथा सहकारी  र इन्दिरा थापा - स्वास्थ्य राज्यमन्त्री बन्ने छन् ।​

यस्तै, नेकपा माओवादी केन्द्रबाट राजेन्द्रकुमार कार्की - सामाजिक र नारायण बुर्जा मगरलाई खानेपानी सिंचाइ तथा ऊर्जा मन्त्री बनाउने तयारी भएको स्रोतले जनाएको छ । राष्ट्रिय सभा निर्वाचनमा माओवादी केन्द्रकी चम्पादेवी कार्की पराजित बनेपछि दुई मन्त्री बनाउन मुख्यमन्त्री सहमत भएका हुन् ।

हाल प्रदेश सरकारमा कांग्रेसबाट शम्शेर राई आन्तरिक मामिला तथा कानून, माओवादीका गणेश उप्रेती पर्यटन, वन तथा वातावरण र नेकपा एसका कमलप्रसाद जबेगु भौतिक पूर्वाधार मन्त्री छन् ।