काठमाडौँ । जनकपुरधाममा बुधबार विवाह पञ्चमी महोत्सवअन्तर्गतको तिलकोत्सव विधिको आयोजना हुने भएको छ । प्राचीनकालमा राजा जनकले अयोध्याबाट आएका राम र उनका परिवारका सदस्यहरूलाई सम्मानपूर्वक स्वागत गर्दै साताव्यापी विवाह महोत्सवको चौथो दिन आज तिलकोत्सव समारोह हुन थालेको हो । राम मन्दिर प्राङ्गणमा हुने उक्त समारोहले ऐतिहासिक विवाहको घटनालाई सम्झाउने गर्दछ ।

तिलकोत्सव विधिमा अयोध्याबाट आएका जन्तीलाई सम्मानका लागि विशेष कार्यक्रम आयोजना गरिन्छ । जनकपुरधाममा राम मन्दिर र जानकी मन्दिरका महन्तबिच सम्धी मिलन गरिन्छ भने सो अवसरमा मिथिला क्षेत्रका सांस्कृतिक नृत्य पनि प्रस्तुत गरिन्छ ।

भारत र नेपालका हजारौं श्रद्धालु यो समारोहमा सहभागी हुन जनकपुरधाम आउने गर्दछन् । जनकपुरधामका स्थानीयवासीले पाहुनाहरूलाई मिठा परिकार र सांस्कृतिक झलकसहित स्वागत गर्ने गर्दछन् ।

सात दिनसम्म मनाइने विवाह पञ्चमी महोत्सवको महत्त्वपूर्ण विधिमध्ये तिलकोत्सव पनि हो भने पञ्चमीका दिन सीता र रामको परम्परागत विवाह समारोहको स्मरण गर्दै विवाह विधि सम्पन्न गरेपछि साताव्यापी रुपमा मनाइने विवाह महोत्सव सम्पन्न हुन्छ ।
यसपालि अयोध्याबाट आएका जन्तीले जनकपुरधामको विवाह पञ्चमीमा थप उत्साह थपेको छ ।