पृथ्वी राजमार्गको बेनिघाटमा त्रिशुली रिभरसाइड रिसोर्ट सञ्चालन गरिरहेका उद्दव कँडेलले त्रिशुली नदी पारी 'त्रिशुली भिल्ला' सञ्चालनमा ल्याएका छन् ।   

१५ रोपनी क्षेत्रफलमा फैलिएको भिल्लाको निर्माणमा करिब १० करोड रूपैयाँ लगानी भएको सञ्चालक कँडेलले बताए ।  

त्रिशुली रिभर साइड रिसोर्टभन्दा लक्जरी सुविधासहितको यी १२ वटा आकर्षक भिल्लाहरूमा ३७ वटा कोठा छन् । 

२२ वटा कोठा सञ्चालनमा आएको र अबको केही महिनामै बाँकी १५ वटा सञ्चालनमा ल्याइने सञ्चालक कँडेलले बताए ।

भिल्लामा तीन सय जना क्षमताको कन्फ्रेन्स हल छ। जसले कर्पोरेट ग्राहकहरूलाई समेत सहज हुने कँडेलको विश्वास छ । 'वेलनेस' प्रेमी पाहुनालाई ध्यानमा राख्दै भिल्लामा साउना र स्टिम समेत निर्माण गरिएको छ ।

यसबाहेक आवश्यकता अनुसार भिल्लाका ग्राहकहरूले प्राइभेट पार्टी, क्याम्प फायर, बार्बिक्यु लगायतको मज्जा लिन सक्नेछन् । 

भिल्लामा न्यूनतम चार हजार रूपैयाँ देखिको प्याकेज बुक गर्न सकिन्छ ।

भिल्लामा बुकिङ गर्ने ग्राहकले डिनर, रूम र ब्रेकफास्टसँगै वेलनेस प्याकेज अन्तर्गत स्विमिङ पुल, साउना, स्टिम र हाइकिङ समेत पाउँछन्। भिल्लामा पुगेका पाहुनाहरूलाई यी सबै किसिमका लक्जरी सुविधाहरू उपलब्ध छ । 

भिल्लामा रेस्टुरेन्ट तथा बारको समेत व्यवस्था गरिएको छ । रूमको बालकोनीबाट त्रिशुली नदीको सुन्दर दृश्यावलोकन गर्न पाउनु भिल्लाको अर्को आकर्षण रहेको सञ्चालक बताउँछन् ।

रिभरसाइड रिसोर्ट साहसिक पर्यटनको हबको रूपमा विकास हुँदैछ । त्रिशुली नदी माथि स्काइ साइक्लिङ, जिपलाइन, त्रिशुली नदीमा साहसिक र्‍याफ्टिङ जस्ता साहसिक पर्यटनको अनुभव लिन सकिनेछ ।

भिल्ला पुग्न पृथ्वी राजमार्गको मालिङ्गा झरेपछि त्रिशुली रिभरसाइड रिसोर्टबाट जिपलाइन वा स्काई साइक्लिङमार्फत जान सकिन्छ । 

एडभेञ्चर नरोज्ने पाहुनाहरू झोलुङ्गे पुल तरेर भिल्ला पुग्न सक्छन् । सवारी साधन लिएर जानेका लागि नदी वारी नै पार्किङको सुविधा छ । 

बाइकमा भने झलुङ्गे पुल हुँदै भिल्ला सम्मै पुग्न सकिन्छ ।