काठमाडौँ । गुल्मीको प्रसिद्ध धार्मिक स्थल रेसुङ्गामा एक महिने साउने मेला सुरु भएको छ । विगतका वर्षहरुमा जस्तै अहिले पनि साउने मेला सुरु भएको हो । धार्मिक, ऐतिहासिक तथा पर्यटकीय दृष्टिकोणले निकै महत्त्वपूर्ण मानिने तपोभूमि रेसुङ्गा पोखरीमा स्नान गरेमा सम्पूर्ण पापहरु नष्ट भएर पुण्य तथा समृद्धी प्राप्त हुने धार्मिक जनविश्वास रहेको छ ।

चार धामवाट ल्याएको जल (पानी) रेसुङ्गाको पोखरीमा मिसाइएकाले रेसुङ्गा पोखरीमा स्नान गरेमा पुण्य प्राप्त हुने धार्मिक विश्वास रहेको रेसुङ्गा संरक्षण समितिका अध्यक्ष सुरेशचन्द्र भुसालले जानकारी दिए।

बिहीबार बिहानैबाट रेसुङ्गा पोखरीमा स्नान गरी यज्ञशालाको दर्शन गर्ने दर्शनार्र्थीहरुको घुइँचो लागेको छ । मेलाकोे अवलोकन गर्न गुल्मीसहित अर्घाखाँची, पाल्पा, स्याङजा, प्युठान, बाग्लुङ्ग लगाएतका स्थानबाट दर्शनार्थीहरु आउने गरेको समितिका अध्यक्ष भुसालले बताए ।

साउने मेलाभर रेसुङ्गामा विद्वानहरुबाट प्रवचन, सामूहिक रुद्री, ग्रहजप, भक्तिसंगीत प्रतियोगिता लगायतका बिशेष कार्यक्रम गरिने रेसुङ्गा संरक्षण समितिले जनाएको छ । दैनिक वेद चण्डी, रुद्री, गीता पाठ, पाञ्चायन देवता पुजन हुने समितीले जनाएको छ ।