वासिङ्टन । अमेरिकी राष्ट्रपति डोनाल्ड ट्रम्पले इरानविरुद्धको सम्भावित सैन्य कारबाही तत्कालका लागि स्थगित गरिएको घोषणा गरेका छन् । उनले आफ्नै सामाजिक सञ्जालमार्फत शान्ति सम्झौता अन्तिम चरणमा पुगेको दाबी गरेका हुन् ।

ट्रम्पका अनुसार संयुक्त राज्य अमेरिका सैन्य रूपमा कारबाही गर्न पूर्ण रूपमा सक्षम भए पनि इरान तथा मध्यपूर्वका केही मुलुकको आग्रहलाई ध्यानमा राख्दै आक्रमण रोक्ने निर्णय गरिएको हो । उनले सम्झौताको प्रारूप तयार भइसकेको र अब त्यसलाई अन्तिम रूप दिने प्रक्रिया अघि बढिरहेको बताएका छन् ।

उनले प्रस्तावित सम्झौतामा हर्मुज जलडमरूमध्य तत्काल, पूर्ण र निर्बाध रूपमा सञ्चालनमा ल्याउने तथा इरानसँग सम्बन्धित आणविक जोखिम अन्त्य गर्ने विषय समावेश गरिएको दाबी गरेका छन् ।

ट्रम्पले विश्व शान्ति, क्षेत्रीय स्थिरता र इरानको दीर्घकालीन समृद्धिलाई मध्यनजर गर्दै आक्रमण स्थगित गर्ने निर्णय गरिएको उल्लेख गरेका छन् । साथै, यस निर्णयमा इजरायलले पनि समर्थन जनाएको उनको दाबी छ ।

सामाजिक सञ्जालमा सार्वजनिक सन्देशमार्फत ट्रम्पले सम्बन्धित सबै पक्षलाई वार्तालाई शीघ्र निष्कर्षमा पुर्‍याई शान्ति सम्झौता सम्पन्न गर्न आग्रह गरेका छन् ।