काठमाडौं । इरानी सर्वोच्च नेता मोज्तबा खामेनीको स्वास्थ्य अवस्था गम्भीर भएपछि उनलाई अस्पताल भर्ना गरिएको इजरायली सञ्चारमाध्यमले दाबी गरेका छन् ।

इजरायली च्यानल–१४ ले इरानभित्रका स्रोतलाई उद्धृत गर्दै खामेनीको अवस्था गम्भीर रहेको जनाएको छ । यस्तै, जेरुसेलम पोस्टले उद्धृत गरेको एक स्रोतले पनि उनको स्वास्थ्य अवस्था चिन्ताजनक रहेको दाबी गरेको छ ।

सन् २०२६ फेब्रुअरी २८ मा अमेरिका र इजरायलले गरेको संयुक्त सैन्य आक्रमणमा आफ्ना पिता अली खामेनीको मृत्यु भएपछि मोज्तबा खामेनीले सर्वोच्च नेताको जिम्मेवारी सम्हालेको बताइएको छ । तर पदभार ग्रहण गरेयता उनी कुनै सार्वजनिक कार्यक्रममा देखिएका छैनन् ।

खामेनीले लिखित वक्तव्यमार्फत प्रशासनिक तथा राजनीतिक गतिविधि सञ्चालन गर्दै आएको समाचारमा उल्लेख छ । आक्रमणको सुरुवाती चरणमै उनी घाइते भएको दाबीसमेत गरिएको छ ।

राष्ट्रपति मसूद पेजेस्कियानले राष्ट्रिय टेलिभिजनमा दिएको अन्तर्वार्ताका क्रममा खामेनीसँग प्रत्यक्ष संवाद तथा अन्तरक्रिया अहिले ‘निकै कठिन’ रहेको बताएको उल्लेख छ । यसले उनको स्वास्थ्य अवस्थाबारे भइरहेका अड्कलबाजीलाई थप बल दिएको समाचार संस्था एएनआईले जनाएको छ ।

यसअघि इरानको स्वास्थ्य मन्त्रालयका प्रतिनिधिले खामेनीलाई लागेको प्रारम्भिक चोट सतही प्रकृतिको रहेको बताएका थिए । यद्यपि पछिल्लो समय उनको स्वास्थ्य अवस्था गम्भीर बनेको दाबी इजरायली सञ्चारमाध्यमहरूले गरेका छन् ।