काठमाडौं । दैलेख जिल्लाको दुल्लु नगरपालिका वडा नं. १३ का वडासचिव कमल भण्डारीलाई फोनमार्फत धम्की दिने प्रकाश खड्कालाई कारबाही गर्न प्रधानमन्त्री तथा मन्त्रिपरिषद्को कार्यालयले निर्देशन दिएको छ । प्रधानमन्त्री कार्यालयको दुरुपयोग गरी अश्लील भाषा बोल्दै दबाब र धम्की दिएका खड्कालाई तत्काल कानुनी कारबाही गर्न निर्देशन दिइएको हो । 

वडा सचिवलाई धम्काउने प्रकाश खड्कालाई कारबाही गर्न सुरक्षा एवम् अनुसन्धान निकायलाई निर्देशन दिँदै प्रधानमन्त्री तथा मन्त्रिपरिषद्को कार्यालयका सहसचिव तथा प्रवक्ता हेमराज अर्यालले विज्ञप्ति जारी गरेका छन् । 

खड्काले सचिव भण्डारीलाई धम्की दिएको अडिओ सामाजिक सञ्जालमा भाइरल भएपछि प्रधानमन्त्री तथा मन्त्रिपरिषद्को कार्यालयले त्यस घटनाबारे चासो राखेको देखिएको छ । 

प्रवक्ता अर्यालले जारी गरेको विज्ञप्तिमा कर्मचारीको मनोबल उच्च राख्नु तथा सुरक्षित कार्य वातावरण सुनिश्चित गर्नु सरकारको दायित्व भएको उल्लेख गर्दै सुशासन, विधिको शासन र प्रशासनिक अनुशासन कायम गर्न यस्ता गतिविधिमाथि कडा निगरानी आवश्यक रहेको उल्लेख छ ।