काठमाडौं । प्रहरीले दैलेख जिल्लाको दुल्लु नगरपालिका वडा नं. १३ का वडासचिव कमल भण्डारीलाई धम्की दिने व्यक्तिलाई पक्राउ गरेको छ । वडासचिवसँगको टेलिफोन संवाद भाइरल भएपछि र प्रधानमन्त्री तथा मन्त्रिपरिषद्को कार्यालयले समेत चासो लिएपछि खड्कालाई जिल्ला प्रहरी परिसर काठमाडौंको टोलीले पक्राउ गरेको हो । 

प्रहरीले दिएको जानकारी अनुसार सुर्खेतको वीरेन्द्रनगर नगरपालिका–६ वीरेन्द्रचोक टोल घर भई जिल्ला काठमाडौँ, शंखमुल बस्ने २२ वर्षीय खड्का आज पक्राउ परेका छन् । उनलाई नियन्त्रणमा लिएर प्रहरीले अनुसन्धान गरिरहेको जनाएको छ । 

खड्काले वडा सचिव भण्डारीलाई प्रधानमन्त्री कार्यालयको नाम लिएर फोन गरी धम्क्याएको अडियो अहिले सामाजिक सञ्जालमा भाइरल भइरहेको छ । उक्त अडियो सार्वजनिक हुनासाथ प्रधानमन्त्री कार्यालयले खड्कालाई तत्काल कानुनको दायरामा ल्याई आवश्यक कारबाही प्रक्रिया अगाडि बढाउन सम्बन्धित सुरक्षा निकाय एवम् अनुसन्धान निकायलाई कडा निर्देशन दिएको थियो ।