चितवन । लगातारको वर्षाका कारण पहिरो र ढुंगा खस्दा मुग्लिन–नारायणगढ सडकखण्ड एकतर्फी सञ्चालनमा आएको छ । सडक डिभिजन कार्यालय भरतपुरका अनुसार तुइन खोला पुल र नाम्सी खोलाको नयाँ पुल नजिक माथिबाट ढुंगा खसेपछि यातायात प्रभावित भएको हो । 

यस्तै, सिमलताल क्षेत्रमा लेदो सडकमा बगेपछि पनि सवारी आवागमन एकतर्फी रूपमा सञ्चालन भइरहेको छ । सडकलाई पूर्ण रूपमा सञ्चालनमा ल्याउन डोजर, आवश्यक उपकरण र प्राविधिक जनशक्ति परिचालन गरिएको कार्यालयले जनाएको छ । मौसमले साथ दिएर थप पहिरो वा ढुंगा नखसेमा करिब एक घण्टाभित्र सडक दुवैतर्फ सञ्चालनमा ल्याउने लक्ष्य राखिएको छ ।

यद्यपि, सो क्षेत्रमा वर्षा जारी रहेकाले पहिरोको जोखिम अझै कायम छ । त्यसैले चालक तथा यात्रुले यात्रा अघि सडकको पछिल्लो अवस्थाबारे जानकारी लिएर मात्र सुरक्षित रूपमा यात्रा गर्न सडक डिभिजन कार्यालय भरतपुरले आग्रह गरेको छ ।