काठमाडौं । प्रहरीले विराटनगरस्थित औद्योगिक घराना देवनरा ग्रुपसँग सम्बन्धित मुन्दडा समूहका सञ्चालकको निवासमा छापा मारेर खानतलासी गरेको छ । मोरङ प्रहरीले विराटनगर महानगरपालिका–७, मेघराज मार्गस्थित मुन्दडा परिवारको घरमा सोमबार बिहानैदेखि सुरक्षा घेरा हालेर खोजतलास गरेको हो ।

जिल्ला प्रहरी कार्यालय मोरङको टोली बिहान करिब ४ः४५ बजे घटनास्थल पुगेको बताइएको छ । प्रहरीले खानतलासी गरिरहेको पुष्टि भए पनि यसको कारण र अनुसन्धानको विषयबारे औपचारिक जानकारी सार्वजनिक गरेको छैन ।

देवनरा ग्रुपका प्रमुख सञ्चालक उद्योगी प्रकाश मुन्दडा हुन् । उनले बाबा रिफाइनरी, जेजे ज्वेलर्स, बाबा जुट मिल, हाइलाइफ चप्पललगायत विभिन्न उद्योग सञ्चालन गर्दै आएका छन् । साथै साबुनसहित अन्य उद्योगमा पनि उनको संयुक्त लगानी रहेको बताइन्छ । उनी मोरङ उद्योग व्यापार संघ का पूर्वअध्यक्षसमेत हुन् ।