काठमाडौं । देशभर मनसुनी प्रणाली सक्रिय रहेकाले आज पनि अधिकांश क्षेत्रमा वर्षाको सम्भावना रहेको छ । जल तथा मौसम पूर्वानुमान महाशाखाका अनुसार मनसुनको न्यून चापीय रेखा पूर्वी क्षेत्रमा औसत स्थानको आसपास र पश्चिमी क्षेत्रमा औसत स्थानभन्दा केही उत्तरतर्फ रहेकाले वर्षाको प्रभाव कायम रहने देखिएको हो ।

हाल बागमती, गण्डकी र सुदूरपश्चिम प्रदेशका अधिकांश स्थानमा बदली छ भने कोशी, लुम्बिनी र कर्णालीका पहाडी क्षेत्रमा पनि मौसम सामान्यदेखि पूर्ण बदली रहेको छ । केही स्थानमा हल्का वर्षा भइरहेको महाशाखाले जनाएको छ ।

आज दिउँसो देशभर सामान्यदेखि पूर्ण बदली रहने अनुमान गरिएको छ । पहाडी तथा हिमाली क्षेत्रका केही स्थानमा मध्यम वर्षा हुने सम्भावना रहेको छ भने उच्च हिमाली क्षेत्रमा हल्का हिमपातसमेत हुन सक्छ। तराईका केही स्थानमा पनि मध्यम वर्षा हुने पूर्वानुमान गरिएको छ ।

रातिको समयमा पनि मौसममा खासै सुधार नआउने महाशाखाले जनाएको छ । कोशी, बागमती, गण्डकी, लुम्बिनी, कर्णाली र सुदूरपश्चिम प्रदेशका पहाडी भूभागमा मध्यम वर्षा हुन सक्नेछ भने हिमाली क्षेत्रमा वर्षा वा हिमपातको सम्भावना कायम रहनेछ। तराईका केही क्षेत्रमा पनि वर्षा हुने अनुमान छ ।

निरन्तर वर्षासँगै नदी तथा खोलामा पानीको बहाव बढ्ने, गेग्रान बग्ने, बाढी, पहिरो र भूक्षयको जोखिम उच्च रहने भएकाले आवश्यक सतर्कता अपनाउन महाशाखाले आग्रह गरेको छ । यसबाट दैनिक जनजीवन, कृषि, स्वास्थ्य सेवा, पर्यटन तथा सडक र हवाई यातायात प्रभावित हुन सक्ने भएकाले मौसमसम्बन्धी अद्यावधिक सूचना नियमित रूपमा पछ्याउन पनि अनुरोध गरिएको छ ।