काठमाडौं । तीन दिनदेखि बेपत्ता रहेका कपिलवस्तु नगरपालिकाका पूर्वमेयर किरण सिंह मृत फेला परेका छन् । ६५ वर्षीय सिंहको शव आइतबार मध्याह्न फेला परेको जिल्ला प्रहरी कार्यालय कपिलवस्तुका एसपी मनोहरप्रसाद भट्टले जानकारी दिएका छन् ।

सिंह शुक्रबार दिउँसोदेखि सम्पर्कविहीन थिए । बेपत्ता हुनुअघि उनले आफूले बाटो बिराएको भन्दै व्यावसायिक साझेदारलाई फोन गरेका थिए । उनले सम्पर्क गरेको क्षेत्रबाटै शव फेला परेको प्रहरीले जनाएको छ ।

एसपी भट्टका अनुसार घटनाबारे प्रहरीले थप अनुसन्धान गरिरहेको छ । सिंह २०७४ सालमा नेपाली कांग्रेसबाट कपिलवस्तु नगरपालिकाको मेयरमा निर्वाचित भएका थिए ।