काठमाडौं । आज आषाढ कृष्ण पक्षको निर्जला एकादशी पर्व श्रद्धा र भक्तिपूर्वक मनाइँदै छ । वैदिक सनातन परम्पराअनुसार आजको दिन भगवान विष्णुको पूजा–आराधना गरी व्रत बस्ने तथा तुलसीको मठमा दल राख्ने चलन छ ।

निर्जला एकादशीलाई वर्षभरिका २४ वटा एकादशीमध्ये विशेष महत्वको एकादशीका रूपमा लिने गरिन्छ । धार्मिक मान्यताअनुसार आजको दिन जलसमेत ग्रहण नगरी व्रत बसेमा सबै एकादशी व्रतको पुण्य प्राप्त हुने विश्वास छ ।

यस अवसरमा भक्तजनहरूले बिहानै स्नान गरी भगवान विष्णु, तुलसी तथा पीपलको पूजा गर्ने, मन्दिरमा दर्शन गर्ने र दान–पुण्य गर्ने परम्परा छ । आजकै दिन घर–घरमा रहेको तुलसीको मठमा नयाँ दल राख्ने प्रचलन पनि रहेको छ ।

धार्मिक विश्वासअनुसार निर्जला एकादशीको व्रत, पूजा र दान–पुण्यले मनोकामना पूरा हुने, पाप नाश हुने तथा सुख, शान्ति र समृद्धि प्राप्त हुने जनविश्वास रहेको छ ।