काठमाडौं । सरकारले इन्टर्न चिकित्सकहरूको स्टाइपेन्डसम्बन्धी माग अझै सम्बोधन नगरेको भन्दै ‘एमबीबीएस–बीडीएस स्टाइपेन्ड एकरूपता अभियान नेपाल’का संयोजक डिल्ली हरिजन मंगलबारदेखि काठमाडौंको माइतीघर मण्डलामा आमरण अनशनमा बसेका छन् । हरिजनले मंगलबार बिहान १०ः२५ बजेदेखि आमरण अनशन सुरु गरेको घोषणा गरेका हुन् ।

अनशन घोषणा गर्दै उनले यो निर्णय व्यक्तिगत स्वार्थ वा आवेगका कारण नभई न्यायोचित माग पूरा गराउन बाध्य भएर लिनुपरेको बताएका छन् । विगत चार महिनादेखि शिक्षा मन्त्रालय, चिकित्सा शिक्षा आयोग, सांसद तथा अन्य सरोकारवाला निकायसँग निरन्तर संवाद र पहल गरे पनि माग सम्बोधन हुन नसकेको उनको भनाइ छ ।

उनका अनुसार आन्दोलनभन्दा अघि संवाद, टकरावभन्दा अघि समाधान र विरोधभन्दा अघि विश्वासको बाटो रोजिए पनि शिक्षा तथा खेलकुदमन्त्रीको अध्यक्षतामा गठित कार्यदलले तयार पारेको प्रतिवेदनअनुसार आवश्यक निर्णय अझै हुन सकेको छैन ।

हरिजनले आमरण अनशन चिकित्सक वा विद्यार्थीको चाहना नभई समयमै निर्णय गर्न नसक्ने राज्य संयन्त्रको ढिलासुस्ती र गैरजिम्मेवारीको परिणाम भएको बताएका छन् । उनले इन्टर्न चिकित्सकहरूको स्टाइपेन्डमा एकरूपता कायम गर्दै कार्यदलको सिफारिस तत्काल कार्यान्वयन गर्न सरकारसँग माग गरेका छन् ।