काठमाडौं । नेपाली कांग्रेसले सुनसरीसहित मधेसका विभिन्न जिल्लामा हालै भएका घटनाको निष्पक्ष, स्वतन्त्र र विश्वसनीय छानबिनका लागि उच्चस्तरीय न्यायिक आयोग गठन गर्न सरकारसँग माग गरेको छ । बुधबार आयोजित पत्रकार सम्मेलनमा पार्टीका प्रवक्ता देवराज चालिसेले सुनसरी र मधेसका विभिन्न स्थानमा देखिएका सामाजिक तथा साम्प्रदायिक तनावका घटनालाई सामान्य रूपमा लिन नहुने बताएका हुन् । 

उनले घटनाको वास्तविक कारण र त्यसबाट भएको क्षतिको सत्यतथ्य बाहिर ल्याउन निष्पक्ष अनुसन्धान आवश्यक रहेको बताए । चालिसेका अनुसार सरकारले गठन गरेका हालका छानबिन समितिले जनविश्वास प्राप्त गर्न नसक्ने दाबी गर्दै ती समिति प्रभावकारीभन्दा पनि औपचारिकतामा सीमित रहेको टिप्पणी गरे ।

उनले जनताले विश्वास गर्न सक्ने स्वतन्त्र र निष्पक्ष उच्चस्तरीय न्यायिक आयोग गठन गरेर घटनाको वस्तुगत अनुसन्धान गर्न तथा दोषीलाई कानुनी दायरामा ल्याउन सरकारलाई आग्रह गरे ।

कांग्रेसले मुलुकमा सामाजिक सद्भाव, शान्ति र राष्ट्रिय एकता कायम राख्न आफू प्रतिबद्ध रहेको पनि जनाएको छ । प्रवक्ता चालिसेले देशभर पार्टीका संयन्त्रलाई सामाजिक सद्भाव कायम राख्ने अभियानमा सक्रिय बनाइएको जानकारी दिए ।

साथै, घटनाको सत्यतथ्य छानबिन गरी पीडितलाई न्याय दिलाउन र दोषीमाथि कानुनअनुसार कारबाही गर्न ढिलाइ नगर्न सरकारको ध्यानाकर्षण गराइएको कांग्रेसले जनाएको छ ।