काठमाण्डौ । प्रधानमन्त्री वालेन्द्र शाहले नेपालका लागि भारतीय र चिनियाँ राजदूतसँग सोमबार छुट्टाछुट्टै भेटवार्ता गर्ने भएका छन् । परराष्ट्र मन्त्रालय स्रोतका अनुसार प्रधानमन्त्री शाहले भारतीय राजदूत नवीन श्रीवास्तवसँग सोमबार बिहान ११ बजे भेटवार्ता गर्ने कार्यक्रम तय भएको छ । त्यस्तै, चिनियाँ राजदूत चाङ माओमिङसँग अपराह्न ३ बजे भेटवार्ता गर्ने तयारी छ ।

प्रधानमन्त्री नियुक्त भएपछि शाहले यसअघि राजदूत तथा विभिन्न कूटनीतिक नियोगका प्रमुखहरूसँग सामूहिक भेटवार्ता गरेका थिए । गत चैत २५ गते भएको उक्त भेटमा विदेशी कूटनीतिज्ञहरूले प्रधानमन्त्री शाहलाई बधाई दिँदै सफल कार्यकालको शुभकामना दिएका थिए ।

प्रधानमन्त्री शाहले यसअघि विदेशी कूटनीतिज्ञसँग एक्लाएक्लै भेटवार्ता नगर्ने नीति लिएका थिए। तर, पछिल्लो समय उनले अन्तर्राष्ट्रिय साझेदारसँग द्विपक्षीय रूपमा छलफल अघि बढाउन थालेका छन् ।

गत असार २३ गते प्रधानमन्त्री शाहले एसियाली विकास बैंक (एडीबी)का अध्यक्ष मासातो कान्दासँग सिंहदरबारमा एक्लाएक्लै भेटवार्ता गरेका थिए । उक्त भेटमा सुशासन प्रवर्द्धन, आर्थिक सुधार र पूर्वाधार विकास लगायतका विषयमा छलफल भएको थियो ।

एडीबी अध्यक्षसँगको भेटपछि प्रधानमन्त्री शाहले पहिलोपटक नेपालका दुई प्रमुख छिमेकी भारत र चीनका राजदूतसँग छुट्टाछुट्टै भेटवार्ता गर्न लागेका हुन् ।

सोमबार हुने यी भेटवार्तालाई नेपाल–भारत तथा नेपाल–चीन सम्बन्धका साथै आपसी सहयोग र समसामयिक द्विपक्षीय विषयमा छलफल गर्ने महत्वपूर्ण अवसरका रूपमा हेरिएको छ ।