काठमाडौं । सत्तारुढ दल राष्ट्रिय स्वतन्त्र पार्टी (रास्वपा)का सभापति रवि लामिछानेले मन्त्रीसहित प्रतिनिधिसभामा रहेका पार्टीका सांसदहरूको बैठक बोलाएका छन् । रास्वपाका केही सांसदको भाषा तथा संसद् र संसदीय समितिमा प्रस्तुत हुने मर्यादामाथि प्रश्न उठेपछि सभापति लामिछानेले बैठक बोलाएका हुन् ।

बिहान ११ बजेका लागि बोलाइएको बैठकमा संसद् तथा समितिमा प्रयोग भएको भाषा र सांसदहरूको गतिविधिबारे उठेका प्रश्नका विषयमा छलफल हुने र सम्बन्धित सांसदहरूलाई आवश्यक निर्देशन दिइने रास्वपा स्रोतले जनाएको छ ।

पछिल्लो समय रास्वपाका केही सांसदले नै सरकारविरुद्ध सार्वजनिक रूपमा अभिव्यक्ति दिन थालेपछि सभापति लामिछानेले मन्त्रीहरूलाई समेत बैठकमा बोलाएका छन् ।

आफ्नै पार्टीका सांसदहरूले सरकारको आलोचना गर्नुको कारणबारे पनि बैठकमा छलफल हुने स्रोतले जानकारी दिएको छ । बैठकमा सांसदहरूको भूमिका, पार्टीको सरकारमा सहभागिता तथा सरकारका कामकारबाहीबारे पार्टीभित्र देखिएको असन्तुष्टिका विषयमा समेत छलफल हुन सक्ने बताइएको छ ।